Thirteen Reasons Why by Jay Asher - ketabablelnoom on Goodreads ~ كــتاب قــبل الـنــوم

للأسف وبالرغم من شهرة الكتاب حاليا - بسبب المسلسل المقتبس منه طبعا – إلا إن عيوب الكتاب كتيرة منها الأسلوب وطريقة الكتابه نفسها احتاجت مني وقت في البدايه عشان اتفهمها واتعود عليها وأقدر اتابع القراءه .. والعيب الأكبر كان الشخصيات الشخصيات الشخصيات ..
موضوع شرايط الكاسيت كانت رائعه أكيد ، فكرة الكتاب واختياره لموضوع زي الانتحار خصوصا لانتشاره في العالم كان الموضوع مهم وكويس لكن في سؤال أهم اتسأل قدامي وهو ..
الكتاب قديم ومن فترة ليه ما اتشهرش غير قريب مع أخبار عن تحويله لفيلم وبعدها الكلام اتغير واتعمل مسلسل ..

الاجابه هي أكيد ثم أكيد الدعايا الضخمه ورا صناعة العمل الفني ..
الكتاب مش قوي ولا رائع في تقديمه للفكرة بل بالعكس في مشاكل كتيرة وأهمها عدم تواجد أي أبعاد تفصيليه عن الشخصيات كلها وبيكتفي بعرض صوت هانا والحدوته من وجهة نظرها مع أحاسيس كلاي وردود أفعاله البسيطه ناحيتها ..
لكن فين باقي الشخصيات من الأحداث ؟

وإيه هي الأسباب الحقيقية لأفعالهم ؟
مفيش شر لمجرد الشر خصوصا إننا بنتكلم عن مراهقين في مدرسة مش في حروب عصابات مثلا
المواضيع المذكورة كلها شائكه بداية بالانتحار والتحرش الجنسي والاغتصاب والتنمر ومشاكل تانية كتير بتحصل بشكل يومي تقريبا ، على عكس معظم الآراء اللي سمعتها أنا مش شايفه أي نوع من المبالغه في طريقة العرض بالعكس المقصود إنه يكون صادم كان لازم يتم ده بعرض الحقيقة عاريه بدون تجميل

لأول مرة في حياتي – مش مصدقة إني بقول كده – لازم اعترف لو أي حد يسألني اقرأ الكتاب ولا أشوف المسلسل ح يكون الرد اوعى تقرأ الكتاب وشوف المسلسل طبعا ..
اسكربت المسلسل والاخراج قوي وأفضل بكثير رغم بعض الاختلافات عن القصة الأصليه او المقتبسه لكن كلها كانت في خدمة الدراما بل بالعكس المسلسل من وجهة نظري استطاع يوصل الرسالة النهائية أفضل من الكتاب خصوصا إنه بدأ بتأثير حدث زي انتحار شخص على المحيطين بيه أولهم أسرة المنتحر وأصدقائه

المجهود ورا التفاصيل جوا أحداث المسلسل واضحه جدا في كل شئ بداية من رسم الشخصيات نفسها وأبعادهم النفسية .. وتم ذكر ده في فيلم وثائقي عن صناع المسلسل إنه كان في مستشارين في الطب النفسي موجودين لتوجيه كل من الكتاب والممثلين لفهم حالة المشاعر ومنطقية التصرف في كل موقف ، وبعتذر لكل شخص مااقدرش يتفهم بعض ردود أفعال الشخصيات لكن ح أقول إن ده بسبب الجهل ..
الجهل بالمشاكل النفسية زي الاكتئاب والقلق المزمن وأعراض مابعد الصدمه مثلا منتشرة في العالم لكن بزياده في الوطن العربي بدليل إنه لازال عندنا بنعتبر الطبيب النفسي هو ( دكتور المجانين ) ..

لكن من الواضح إن صناع المسلسل كانوا بيحاولوا يعملوا نوع من أنواع التوعيه دليل برضه على إن الجهل بالمشاكل دي وتأثيرها مش عندنا بس لا كمان في كل حته ..
في النهاية في رأيي بعتبر إن الكاتب كان محظوظ جدا رغم كل عيوب كتابه قدر يحقق منه رسالته ويكون سبب في شهرته .. استمتعت بالموضوع ومنتظره أكيد اللي جاي .